يمكن هواي صار عدهم ملل، كل سنة نعيد نفس السؤال والإشكال : عليمن الاحتفال بالكرسمس؟ وماكو جواب مقنع!!
لأن فعلاً ماكو جواب مقنع، هذا الاحتفال هو نتيجة لتربية قسرية تعرضلها العقل العربي، اسمها الانبهار بالغرب، السعي وراء الغرب، لذلك بأفعال كثيرة نحاول مجاراته، بأي شي وبأي فرصة، ومرات بدون شعور.
ما معقولة نريد نچذب على روحنا ونگول نحتفل لخاطر النبي عيسى وهو نبي ونفرح بولادته، واحنا واصلين مرحلة بمعرفة عيسى بحيث نكتل نفسنا على الأحمر والأشجار وزينتها وبابا نؤيل وقبعته وجواريبه اللي محد راح ينطينه ربط بينها وبين النبي.
رغم احنا بولادة نبينا منسوي هيچ، وخو باقي الأنبياء يا دوب حافظين خمسة منهم!!
ويجوز نگدر نچذب على روحنا ونگول كل هذا احتفاء بإنجازات السنة الفاتت واستعداداً للسنة الجاية، وبالتالي نرجع لنفس الدائرة، هو منو اعتبرها سنة جديدة واحتفل بيها غير العرف والثقافة الغربية.
بس منگدر نچذب على روحنا ونگول احنا ما متأثرين بالغرب، وإذا فتشنا عن مواضع الانبهار رح نلگاها، ويجوز نلگا وياها شعور بالنقص، وبعدنا لهسة متأثرين رغم آخر إنجازاته هو الجندر وتحوّل الذكر الى أنثى والعكس، والتحول حتى إلى حيوان، والاستماتة بالدفاع عن قذارته.. لا زلنا متأثرين رغم كل المآسي اللي سببها للشعوب، ومو آخرها الإبادة على غ•ز•ة وتأييده لقتل الأطفال من أجل الصهاينة.
خلي نكون صريحين وننتبه أكثر وين رايحين بتأثرنا هذا؟!
#مجموعة_إكسير_الحكمة
