تعليق على تعليق
حول برنامج ولاية بطيخ
أكو يعتقدون .. الناس بطرانة أو مكبرة الموضوع من تعترض على بعض الفضائيات أو المسلسلات أو البرامج، مثل ما صار هالأيام على برنامج (ولاية بطيخ).
والصراحة الناس حقها، يعني شلون تريدها متكبّر الأمور ولا تحس بالخطر وانت برنامجك محتواه مثل (شرب شرب)… هل هاي الحلقة الي سويتها تلائم مجتمعنا وأخلاقه ومبادئه؟ هسة إذا واحد غريب وشاف حلقتك شنو راح يگول علينا؟ أكيد يگول هذولي وين واصلين، الشرب عدهم بالشوارع!!
شلون الناس تحسن الظن وبرنامجك برعاية (أستغفر الله جنان) اللي توصّل بيها رسالة عداء الزوج لزوجته وتثاقله من أسرته وأطفاله ومتطلباتهم، وأنو مشروع الزواج فاشل، والسعادة هي من تروح تدور لأماكن تعبانة!
شلون الناس تصدگك وانت برنامجك بوحدة من مواسمه مخلي واحد متدين ويفر بسبحته، بعدين يقشمر على مرته المصدگة بيه ويروح للملاهي!
شلون ما نعتبر بث البرنامج خلال موسم محرم هو إساءة والبرنامج “فكاهي” وفوگاها بيه إيحاءات وألفاظ ما تناسب أخلاق أبسط عائلة، كالعادة.
وفوگ كل هذا وغيره .. يسولف الأخ عن الثوابت والأخلاق والمبادئ، مدري وينها الأخلاق والمبادئ بولاية بطيخ ؟!
ويگول: (احنه ما نبث بيوم السابع والعاشر ويوم الأربعين) زين وباقي الأيام شنو أيام فرح حتى تبث برنامجك الفكاهي؟!
ويگول : (احنه من نمر بشهر محرم نثگّل، يعني نخلي البرامج والمشاهد ثگيلة)، زين شهر رمضان مو شهر محترم والمفروض تثگل ؟ وين الثگل بمسلسل العائلة إكس الي انت مخرجها وكمية الانحطاط بالمسلسل لا يقبل بها إلا السخيف عديم الحياء والغيرة ؟!
فإذا تگولون احنه من الشعب الواحد، وحزنهم حزنّا، فكون تحترمون مناسبة محترمة عند غالبية الشعب، سواء كنت من مذهبنا أو مو من مذهبنا أو أصلاً بدون مذهب، والمناسبة مو بس بيوم السابع أو العاشر وإنما موسم الحزن هو محرم وصفر.
فلا يجي واحد ويبرر : هاي قناتهم وهم مو من مذهبنا، إنما منطقهم الي يسولفون بيه، يحتم عليهم احترام المناسبة.
#مجموعة_إكسير_الحكمة
