من حقك تفحّط وتفحطنا وياك!
وإذا تريد تبهرنا بحركاتك .. احنه هم نتفرج وننبهر .. شعدنا شغل عمل؟!
قابل أكو دوامات لو مدارس لو مرضى لو أمور مستعجلة، لو واحد طالعة روحة من هموم الدنيا، كلشي ما عدنا غير نتفرج على تفحيطاتك!!
خل نفترض كل هذا الكلام واقعي👆
لكن يا عزيزنا
انت تتحمل لو صار حادث بسببك ونقّدتلك فد مية مليون؟!
تتحمل من تصير كارثة بسببك وتتحول للمحكمة ثم للسجن وتضيّع زهرة شبابك؟!
زين ـ حچي بيناتنا ـ إذا انت چنت مستعجل أو عندك دوام أو مريض أو طالعة روحك، وشفت واحد يفحّط وقاطع السير وانت منتظر ليمته يكمل خبالاته ويسمحلك بالعبور .. شراح تگول؟!
راح تكول:
هذا ما عنده ذوق ولا أخلاق ولا إنسانية، وطايش وما عنده ذرة عقل. والشارع مو ملكه ولا ملك الي انطوه سيارة وما أدبوه!
احنه ما نگول عنك هيچ .. بس انت راح تكول هيچ من تشوف واحد يتصرف نفس تصرفك.
الي دعانا لهذا الكلام هو المحبة بيك، وحتى باچر من تتورط ـ لا سمح الله – ما تگول: “محد نبهني، لا أهلي ولا مجتمعي” هسه احنه جاي انّبهك. وبالسلامة.
هذا البلاغ لأخونا أبو الچارجر وكل إلي يسوي مثله.
#تعليق
#مجموعة_إكسير_الحكمة
